Eigetlig …

… hani eifach in Rueh wellen e Kolumne schryybe. Am en eigetlig normaale, jo fascht langwyylige Samschtig. Und eigetlig bini stark vercheltet und sett mol e bitz aaneliggen und Tee drinke. Doch denn froggt e Fründin vo myner Dochter per SMS, wenn sy denn ändlig aachunnt. Denn eigetlig hätt mys Chind scho lengschtes an ihrem Zyyl sette sy. Notürlig isch bi ihrem Handy genau jetz der Akku leer, obwohl mir eigetlig für so Fäll e volli Powerbank in der Schublaade häi. Ich bi denn chly in Sorge die ganz Strecki abgfahre. Nach ere gfüühlten Ewigkeit isch sy denn wohlbehalte bi deere Fründin aacho. Es Bahn- und Bus-Chaos isch schuld gsi. Und das hätt ich eigetlig sette wüsse – bevor i mir zvill Sorge mach.

Denn si no zwoo anderi Sache derzwüsche cho mit in der Gegend umme fahren und Zügs bsorge, wo eigetlig nid so plant gsi weer … Jänu, statt aaneligge hani denn schnäll öbbis ganz anders kocht, als das, woni eigetlig plant ha. Und das, obwohl ich mir für so Fäll jo eigetlig fescht vorgnoo ha, meh abzgee und z deligiere. Nach em Znacht hani my uf em Sofa ine dicki Decki yygmummelet, obwohl ich eigetlig au no e Byygi Wösch zum Zämmelegge hätt und eigetlig jo au no die Kolumne wett schryybe. D Idee und der Ablauf hani scho lang im Chopf, i sett se numme no in der korrekten Oberbaselbieter Mundart in Laptop yyne haue.

Denn hani irgend e Blödsinn gluegt, wo grad im Färnseh gloffen isch, bis my Hündin het wellen in Garte go bisle. Jo, und eigetlig chani denn ammen an der Terrassetüre warte, bis sy fertig isch. An däm Oobe het sy lenger bruucht im Garte, und obwohls mer eigetlig vill z chalt gsi isch, bini hindendryy go güggsle.

Plötzlig hani es Stimmli ghört «hallo, hallo!» rüefe. My alti, betagti Noochberen isch grad elläi im Huus. Eigetlig pflägt sen ihre Maa jede Daag, aber dä isch im Momänt grad im Spital. Ich bi mit der Taschelampen ums Huus ummen und ha bis Noochbers überall yynegluegt. Eigetlig scho im Halbschlof, bini plötzlig hellwach gsi. Ich ha my alt Noochbere gseh in der Stuuben uf em Bode liggen und sofort d Rettig alarmiert. Jetz isch es jo eigetlig so, ass vor allem alti Lüt irgendwo e Huusschlüssel ame rächt plumpen Ort deponiert häi. Ich ha aber nüt gfunde, dorum häi die ville Lüt vo der Füürwehr zimmlig unzimperlig d Huustüren ufbroche.

Ich ha de Saniteeter myni wenigen Informationen über das arme Fraueli gee. Eigetlig chönnt me jo meine, me wüss vill meh über syni Noochbere. Und obwohl si eigetlig rächt verwirrt gsi isch, het die alti Frau gwüsst, wär i bi und no Danke gsäit, bevor sy zum Chrankewaage brocht worden isch.

Eigetlig hätt i denn ändlig chönne go schloofe. Aber ich bi hellwach gsi und ha aagfange, die Zyylen in Laptop ynetippe. Aber in dere Kolumne hani Ihnen eigetlig öbbis ganz anders welle verzelle …

Marianne Lindner-Köhler, 1981 im Baselbiet geboren und aufgewachsen, lebt mit ihrer Familie in München. Als Mary Long tritt sie auf bayerischen und Schweizer Poetry-Slam- und Kleinkunstbühnen auf.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title