Suufer

«Clean in einer Woche». Ohalätz, han ich dänkt, won ich die Überschrift in der eltischte Zyttig vo der Schwyz glääse haa. Doo gohts um Süffel. Oder, no schlimmer, um Droogenaphängigi. Won ich haa afo lääse, han ich aber glyy gmerkt, ass s nääbe de Suffludi und Dröögeler non e dritti Kategoryy Aphängigi git. Die, wo sich nit suufer ernähre.

Es goht um die, wo zum Byspil über e Mittdaag es zäämegstuuchts Yygklemmts mit ere drochnige Schyybe Billigschunggen ässe. Nöimen äinsaam uf emene Bänkli imene drochnige Quinoa-Salaat ummestochere. Oder no schlimmer. Won es sündhaftdüürs Fertigmönü in d Mikrowälle schieben und noochaane bim Ässe die ganzi PC-Taschtatur versoue. Söttige kulinarische Dief-Flieger cha me jetz hälfe.

«Clean Eating» (Suufer Ässe) häisst s Zauberwort.

Das goht denn esoo. Von ere guete Seel, wo mit vill Liebi und Hiigoob chocht, chunnt men es «Kehrpaket» zuegschickt über. Ähnlig wie vor 70 Johr, wo die Weschtalliierte Frässpäckli über Berlin apgworfe häi. Mit em Underschiid, ass d Berliner Frässpäckli gratis gsii syy und «Clean Eating-Kehrpaket» nit grad billig syy. In de modärne Frässpäckli hets es Zmoorgge, es Zmidaag und es Znacht drinn. Hets in de Päckli während em Chrieg überlääbenswichtigi Sache drinn ghaa, hets in de nöimöödigen eenter Zügs drinn, wo nit umbedingt zum Überlääbe wichtig syy. Under anderem Sache wie: Immun-Shot, Spirulina-Dablette, e wohri Proteinbombe, Probiotics, ass d Darmflora nit usem Glyychgwicht chunnt, und Protein-Shakes.

S Zmoorgge, s Zmidaag und s Znacht isch ohni Fläisch oder wie me hütt säit: pflanzebasiert. Natüürlig isch alles Bio und früsch gkocht. Esoo, wies non e Däil Lüt dehäi mache – numme halt vill günschtiger. D Chundschaft, wo deere «Kehrpaket» bstellt, isch allewyyl soumeessig im Stress und hed dorum käi Zyt zum sälber choche. Aso Manager, IT-Spezialischten oder gstressti Bänker. Die ässe denn ganz elläi die gsunde Sachen und chönne sich dernoo wiider so richtig ins Züüg legge. Numme. Wil die Päckli nit grad billig syy, cha sich das au nit jeede läischte.

Öbbis goht bi deer nöien Art, sich z verpflääge, verloore, mäinti ich. Ässen isch doch öbbis Sozials. Das häisst, me sitzt zäämen amene Disch, reedet und isst mitenander. Mi dunkts, wenn mer alsfott meh föngen us Päckli afo ässe, gheie mer alsfott meh zrugg in d Zyt vo de Neandertaler. Die sy au jeede für sich elläi in der Hööli gsässen und häi amene Mamutgotlett ummegnaggt. Immer uf der Huet, ass ene niemer öbbis ewäggnimmt. Der äinzig Underschiid zu de hüttige Päckliässer: D Neandertaler häi s Mammut sälber müese jaage. Doo häi die modärnen Äinsaam-Ässer meh Glück. In ihre Frässpäckli hets sicher käi Mammutfläisch.

Heiner Oberer (64) aus Sissach, langjähriger redaktioneller Mitarbeiter der «Volksstimme».

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title