Parkpilot

Monatelang het der Oski uf dä Momänt blangt: Sy nigelnagelnöi Waage, e VW Tiguan (blau metallisé), isch yytroffe. Mit eme fyyrligerhabene Gfühl isch er uf sy Klappvelo gsässen und isch ins Noochberdoorf gstramplet. Der Chef vo der Garaasch höggschtpersöönlig het en in sy nöis Häiligtum uf Reeder yygfüert – zwoo Stunde lang. Im Oski sy Hiirni het uf Hochtoure grotiert. So vill wundersami Elektronik steckt in somene Tiguan. Fascht nid zum fasse!

Am Schluss het der Garaschischt im Oski as Düpfli uf em i no der Parkpilot demonschtriert. Dä ghöört nid zur Standardusrüschtig. Aber wil der Oski vill in d Stadt mues und Parkblätz dört so rar sy, dass er ständig mues millimeterle, het er dä Zueschlag ohni mit der Wimpere z zucke zahlt. Und ohni e Muggs het sich der Tiguan vor der Garaasch au prompt wie vo Gäischterhand gstüürt in e schmaali Lucke zwüsche zwöi Auti gfüegt, in fümf wunzige Manöver. Wie agossen isch er zwüsche dene zwee Wääge gstande. Vollautomatischi Millimeterarbet!

Der Oski isch häll begäischteret gsii, het sy Klappvelo in Kofferruum zämmeklappt und isch häibraust, besser: uf ere Glückswulke häigschwäbt. Vor der katollische Chille het er der Blinker gstellt und isch uf e Chilleblatz abbooge. Dört isch en äinzigs Auti gstande. As alte Minischtrant het der Oski gwüsst: das vo der Pfaarchöchin. So, het er dänkt, jetz loon ich my Tiguan doch grad emol näbe däm Polo vo dere Chöchin lo yyparke. Zuegee: käi Höggschtschwiirigkäit, aber für en Aafang grad rächt. Är het der Parkpilot yygschalte, d Händ vom Stüür gnoo, zfriide glächlet – und zwoo Sekunde spöter hets dätscht und tschätteret und der Tiguan het die rächt Flangge vom Polo der Lengi nooch ufgrisse, wie wenn er en wett frässe. Schäärbehuffe! Au der Tiguan isch vo voorne bis hinden ufgschränzt gsii und het lengschtens nümm so glänzt wie no vor e baar Sekunde. Und scho isch die verdatteret Pfaarchöchin cho z springen und der Oski isch mit verstäinereter Myynen usgstiige. Irgend öppis het er verwäggslet. Ganz vergelschteret het er s Handbuech us em Bordfach zoogen und s Versicherigsblatt zooberscht oobe mit zittriger Hand usgfüllt. Sy Tiguan het druurig gröchlet, aber er isch no gfahre.

Dehäi häi die Liebschte der Oski am Gaartehaag erwartet. Zerscht häi si nur die intakt Syte vom Tiguan gseh, schön metallisé, und begäischteret klatscht. Denn sy si ums Auti ummegloffe. Der Oski het am Stüür ghüült wien e Schlosshund. Syt däm Daag vor fascht zwöi Johr het er zwar immer non e vollautomatische Parkpilot, aber no vill automatischer wäiss er, dass er dä Parkpilot s ganz Lääbe nie meh bruucht, au wenns em im Duurnveräin syt denn nümm Oski, sondern Parkpilot sääge. Immerhin het öise Parkpilot am letschte Sunntig, won er vor em Gottesdienscht sy Tiguan imen Aaflug vo diefem Gottvertrouen äigehändig und blitzsuuber zwüschen e Polo vo der Pfaarchöchin und e Fiat vom Pfaarer parkiert het, s erscht Mol wider e bitzli chönne lache.

Markus Ramseier ist Leiter der Stiftung für Ortsund Flurnamenforschung Baselland und Schriftsteller. Er wohnt mit seiner Familie in Pratteln.

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title