MUNDART
Ganz ehrlig. Die zwei Wörtli mache mi, ehrlig gsäit, jedes Mol misstrauisch. Ganz ehrlig. Werum mues eine speziell no uf syni Ehrligkeit poche? Het er denn glooge bis hüt? Oder soll ich ihm plötzlig über e Wäg traue, numme wil er säit: I muess Ene ganz ehrlig sage …? Meischtens gohts denn nümmi lang und er hüüchlet schynheilig hinterhär: Syge mer doch ehrlig, Herr Born!

Syge mer doch ehrlig. Die Ufforderig isch e boodeloosi Frächheit. Do wird mir eifach unterstellt, ich syg bis jetz nit immer ganz ehrlig gsi. Jo guet, wenn ich mol ganz ehrlig syy will …

Jo, probier emol, zu hundert Prozänt ehrlig z sy! Ganz ehrlig, das goht gar nit. Was heisst denn «ganz ehrlig syy» überhaupt? Bin i numme denn ganz ehrlig, wenn i spontan jedes warme Lüftli, wo mir dur d Hirn- und Darmwindige weiht, ungfilteret uuse loss? Son e totali Ehrligkeit stinggt doch den andere total. Und das will ich au wiider nit, ehrlig gsäit. Also, wenn ich will ganz ehrlig syy, will i gar nit immer ganz ehrlig syy. Drum halt i lieber ab und zue der Rand. Ganz ehrlig!

Ei Byschpiil: Wenn ich vo me Künschtler an syni Vernissage yyglade wird, sag ich ihm dört sicher nit ehrlig ins Gsicht, was ich vo syne saggschwache Bilder halt. So ehrlig bin i ehrlig gsäit au wiider nit. Ich bin e glaadene Gascht. Drum blyb i aaständig statt ehrlig, stell mi vor e halbwäggs glunge Wärgg und sag: «Das do gfallt mer ehrlig gsäit am beschte. Schad, isch es scho verkauft.» Das hoff ich ämmel wäge däm rote Kläberli am Bilderrahme.

Bim Aadie sage wünsch i däm Künschtler no vyyl Erfolg mit syne Bilder. Ich glaub sogar, er het sich ehrlig gfreut über my Bsuech. Ich bi numme froh, het er mi nit noch myneren ehrlige Meinig über sy Gschliirgg gfrogt.

Aber was hätt em eigentlig ehrlig gantwortet, hätt är mi gfrogt? «I verstand ehrlig gsäit nüt vo modärner Kunscht.» Ganz ehrlig, die Antwort wär nit ganz ehrlig gsi.

Oder hätti lieber saage solle: «Syge mer doch ehrlig, mir wüsse beidi, ass Ihri Bilder billige Schund sin.» So Verurteilige brächt i ganz ehrlig nit über s Härz. Ich bi ehrlig gsäit z feig zum ehrlig z sy.

Wohrschyynlig hätt i mi wiider emol in Humor gflüchtet: «Ihri Bilder sin super, liebe Herr Künschtler, wil, ganz ehrlig gsäit, ich könnts au nit besser.» Denn e Lacher, e Schultereklopfer und tschüss.

Me seht, au d Ehrligkeit het ihri Gränze, speziell in Zyte vo Fake News und KI. Do weisch jo ganz ehrlig nümmi, wäm überhaupt no dörfsch glaube. Drum isch es natürlig hilfrych, ass my Personal-Roboter syni Infos immer aafoot mit: «Ich mues dir ganz ehrlig sage, ...» Denn weiss i grad vo Aafang aa, woraan i bi. Aber ganz ehrlig, e weneli misstrauisch blyb i trotzdäm. Und i dängg an myni eigenen Ehrligkeite. Die gän mir, ehrlig gsäit, scho zimli z dängge. Aber z lang noochedänggen isch au kei Lösig. Ganz ehrlig.

Aernschd Born wohnt in Reinach. Er ist Songpoet, Autor und Kulturschaffender.

Ganz ehrlig

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title