S Boxspringbett

Vor gfühlte füfzg Johr, uf jede Fall no wyt im letschte Johrhundert, häi myni Schwiigerelteren ihri Wohnig ygrichted und syder hets keini gröösseren Änderige me gee, abgseh vom Deppich in der Chuchi und em schnuerlose Delifon. Vor zwöi Johr isch der Schwiigervatter gschtorben und d Nonna isch elei gsi in der Wohnig. Mit der Zyt het si agfange, sich neu yzrichte. Der Deppich im Stägehuus isch ersetzt worde, der Garte mit gschetzde hundert Bluemedöpf het si bedienerfründliger gstalted, vo acht Döpf mit Rosmarin het si die zwee eltschden entsorgt, das heisst vo myner Frau lo entsorge, und au zwöi, drü Noochwuchswienechtsbäumli häi müesse dra glaube. Mit siibenenachtzg Johr cha me nümm hundert Bluemedöpf à jour bhalten und im Hoochsummer mit der Sprützchanne wässere.

Wo denn im Garten Ornig und Übersicht gherrscht häi, het d Nonna d Innenyrichtig afo hinderfroge. Es geeb doch jetz so schön weichi Bett us Amerika, het si verchündet, do drin schlof me vill besser und syg am Morge wie neu gebore. Ihres Ehebett syg doch scho alt und hert und düeg ihrem Rugge nid guet. My Frau het denn usegfunde, ass ihri Mueter vome Boxspringbett redet und ere vorgschlage, emol imene Möbelgschäft go luege. Es sy denn e baar Möbelgschäft worde, aber schlussäntlig sy si fündig worden und häi sone Bett bstellt. Denn isch d Nonna, wie si das all Johr macht, uf Italie, wo si bi Verwandten und Bekannte der Summer verbringt.

S Möbelgschäft het sich denn gmäldet und d Liiferig vom Bett für in vierzäh Dag akündet. Und denn bin au ich ins Spiil cho. Bevor men es neus Bett cha ufstelle, muess me nämmlig Blatz machen und s alten entsorge, und do derzue hets e starke Maa, ebe mi, bruucht. S Bett sälber isch jo no gange, das häi mer relativ brobleemlos in d Einzeldeil chönne zerlegge. Aber bi de Chäschte hets meh handwärkligs Gschick bruucht. Zum einte sy die Chäschte, wo chopfsytig diräkt ans Ehebett montiert gsi sy, mit em neue Bett z wyt usenander gschtande, und der Hängeschrank diräkt überem Bett het gar nümm bassd und ewägg müesse. S isch nid ganz eifach gsi, die ärdbebesicher montierte Schränk vo der Wand z schruuben und denn esoo anezstelle, ass si s neue Bett maassgerächt ygrahmt häi. D Möbelmanne häi denn s neue Bett gliifered und s het wunderbar zwüsche d Chäschte basst. Der Nonna häi mer e baar Foteli vom neue Schlofzimmer uf Italie gschickt.

Z erwähne weer no, ass d Nonna au d Stube will ummöbliere. Si findet d Bolschtergruppe nümm ganz zytgemäss und au e chly duregsässe. Und zum Färnsehluege bruucht si e bekweemere Sässel, eine, wo sen uf Chnopfdruck hydraulisch us der Sitzposition sänkrächt uf d Füess beförderet. S isch alles bstellt. S einzig Brobleem isch no: Wie bringe mer die riisigi alti Bolschtergruppen us der Stube?

Michi Kunz lebt in Zunzgen und schreibt regelmässig für die «Volksstimme».

MUNDART

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title