Vom Abben-Arm-Hansjoggi

S lyt wiider das Brummen übrem Tal. Der Hund tuet ufgregt, und s Wasser vibriert im Glas. Hundert Sattelschlepper mit de Diesel im Leerlauf stönde dänen uf der Autibahn äng hinderenand vor em Nordportal. Allem Aaschyn aa isch im Bölchetunnel en Umfall, jedefalls goht nüt meh.

Im Garte lampe d Escht vom Lorbeer bis uf d Stäägen abe. Die müessen ab, I suech im Schopf s rächt Wärkzüüg. Do find I ganz voll Spinnbuppele s alt Zweysäägli vom Fränkedörfer Urgroossvatter am ne Nagel. Das hämmer immer ufbewahrt, wils e ganz e bsunderi Gschicht het.

Vo Diegte här chunnt jetz en erschts Tatütatü s Loch uf, schloot as Echo vo de Felse zrugg und verschwindet im Tunnel. Gly sys zwoo, fümf, zäh hektischi Sirene – Polizei, Füürwehr und Saniteet suechen e Wäg dur d Kolonne. Mer kenne das Konzärt z Eptige numme z guet!

Vo däm Zweysäägli in myner Hand hämmer as Chinder immer und immer wiider welle ghöre, und s het is tschuuderet, wemmer mit de Fingerli übers Blatt gfahre sy. Die Gschicht vom Martin Hansjoggi, em Urgroossvatter mit em abben Arm, won em um 1905 ummen e roschtige Dorn bim Buure der Arm am Elleboge so ufrysst, ass er e schweeri Bluetvergiftig het. Und wien er doch ums Verworge nit zum Dokter will: Son e Quacksalber chiem em nit ins Huus!

Aber wo der Arm alls wie schweerzer wird und scho fuulig stinkt, do spricht d Urgroossmueter e Machtwort und lot der Dokter doch lo cho. Dä säit nach eim Blick, do chönn me nüt me mache, dä Arm müess ab. Me sell em e Zweysäägli bringen und Kirsch, vill Kirsch, är heb kei Chloroform. Ei Teil Kirsch zum Desinfizieren und der gröösser zur Narkose trunke, denn gieng das scho, der Hansjoggi syg jon e Tapfere.

Und uf em Chuchitisch am Nübrigwäg, so goht d Legände, heb denn der Dokter im Hansjoggi mit sym eigene Zweysäägli der Chnoche under der Aggsle suuber duregsagt und der bös Arm abgnoo. Vo dört aa heb men im Urgroossvatter «Abben-Arm-Hansjoggi» gsäit. Doch heb är sich guet erholt und au mit nummen eim Arm no wyter buuret bis nünzgi. Äfach mit me Riemen oben am Stiil vom Heuel.

Däne vor der Autibahnuffahrt stönde jetz fümf Sattelschlepper, as chönnte sii do der Stau umfahre, die Hirni! Derby isch die Uffahrt scho sit Joore zue. Nummen e Härde Schoof rennt zämmen und gafft übre Haag. D Chauffeur sette jetz uf em schmale Ströössli cheehre und wiider s Tal ab. Ghörsch se flueche bis zu eus übere. Wo der vorderscht 40-Tönner vo «Trans Kiew» die Cheehri nit schafft, nimmt er us Verzwyyflig der steil Wäg in Richtig Challhööchi, ab ins Juhee, wos nienen anegoht. Und alli andere hindedry im blinde Glaube, do wüss en ukrainische Schlaumeier en Umwäg. Es isch e Härdetriib, wie bi de Schoof am Haag.

Übrigens haut das alte Säägli der Lorbeer dure wie nüt, as weers no neu nach 120 Joor! Eis hätt mi as Bueb immer wunder gno: Wo isch er ächt aanecho und gits en ächt no neumen in Sprit yygleit, dä abbi Arm?

Florian Schneider wurde 1959 geboren und stammt aus Reigoldswil. Er ist Sänger, Schauspieler und Liederschreiber und lebt mit Tochter Mina in Eptingen.