Die Fasnacht endet, ehe sie richtig begonnen hat: «Aadie Chluuri …»

Liebi Fasnächtler und Fasnächtlerinne

D Fasnecht goht, wie jedes Joor, äinisch z Änd. Das heisst, gnau gnoo het si das Joor jo gar nie richtig aagfange. Fascht lutlos schallt s Echo vom Fasnachtsloch us em Lock-daun-Loch. Scho lang im Vooruss het öise «Bleiben Sie zu Hause»- Bundesroot gsäit, dass Grossveraastaltige, wie öisi Fasnecht, das Joor nid chönne stattfinde, wäge däm chäibe Virus, wo öis doch scho letscht Joor e dicke Strich dur d Fasnechts-Rächnig gmacht het. Aber fönge mir vo vorne aa:

Scho zwoo Wuche vor öisere Nid-Fasnecht het d Dekogruppe vo der FGS öises Dorf fasnächtlig verschöneret, wie wenn nüt weer. Huu huu.

Will öisi Fasnechtszyttig, «dr Glöggeliwagä», jo het dörfe coronakonform verchauft wärde, isch au das Joor es vollwärtigs Exemplar erschiine. Das heisst, scho lyycht voorhär het der Vorstand im Dorf «s Glöggiwägi» mit ere Hampfle Komfetti und eme Schänkeli verteilt. Dört drin isch denn der Fahrplan gstande, wo und wenn me am Sunntig, respektive us usserordentlige Gründ vo der Nid-Fasnecht, scho am Samschtig cha Plagette und Glöggeliwäge bezieh.

Fascht meh as uf e «Glöggeliwagä» sy mer alli gspannt gsii, was denn am Sunntig am zwöi in öisere Zone chönnti passiere. Punkt zwöi zmittag sy nämmlig gfühlti 250 bis 300 Persone in dr Zone ummeglümmlet. Die mäischte in würklich coronakonforme Grüppli, mit mängisch au chly meh als fünf Persone. Polizischte vom Kanton sy mit «Dialogteam» aagschriibe gsii und häi beobachtend und au informativ uff die Meuti yygwürkt.

Es grosses Komplimänt, wie die Fraue und Manne vo der Polizei das duurezooge häi nach dere doch, säge mir «suboptimale» Prässemittäilig vo der Regierig, wo de Besträbige vom Vorstand vo der FGS total zwider gloffen isch. Liebi Regierig z Lieschtel unde: Schwäin ghaa, chönnt me säge, schliesslig häi anderi für öich d Chohlen us em Füür ghoolt.

Churz nach Yybruch vo der Dunkelhäit isch denn der friidlich Spuk vorby gsii und alli häi sich wider in ihri Löcher verchroche.

Näben em «Glöggeliwagä» het au öises Lokalcheesblatt von Volkes Stimme äinisch meh versuecht, im «Glöggeliwagä» nochezyyfere. Doch oha lätz, das isch ganz schön in d Hoose gange. Wemme inere Redaktion abverheiti Schurnalischte von ere Möchtegärn-Grosspostille z Basel do bi eus z Sissech brobiert z re-integriere, chunnts eben esoo uuse ...

Am Meentigzoobe sy denn, anstatt in de schnitzelbankloose Bäize, Online-Ufftritt vom «Farblos» und andere prominänte Bänk im Netz kursiert.

Veräinzelt het me denn am Zyschtignoomittag verchläideti Chinder in de Näbegasse aadroffe, wo mit Komfetti um sich gschosse und «Gäll, du kennsch mi nid» gruefe häi. Zu was öise Nochwuchs no alles fähig isch, wird in färner Zuekunft in dr «Volksstimm» publiziert, wenn alli Nochwuchsfasnächtler/inne ihri Bilder yygschickt häi.

An deere Stell non es wichtigs Dementi: S Chluuri isch definitiv nid an Corona erchrankt! Schön yybalsamiert und gege Holzwürm gschützt, wartets mitere Ängelsgeduld bis zum nöggschte Joor. Es brenni denn derfür umso besser, schliesslich isch es sit Mönschegedänke s äinzig Chluuri, wo mitere Aalaufstrecki vo gfühlte zwöi Joor in Chluurihimmel würd dörfe goo.

Dass d Langizyt nid z gross wird, häi öisi Obernase vom Vorstand scho mol prophylaktisch es Täschechluuri für alli Gruppe boue, begleitet mit ere Tischbombe (wo läider nid esoo knallt wie im letschte Joorhundert no bim Chluuri). Die cha denn, mit eme gebührende Abstand und maximal sälbs föift abgfacklet und – gmäss Begläitbrief – mit digitalem, coronafreiem Video em Vorstand beziehigswyys der Lexi gschickt wärde. Die knalle denn das uffs Fasnachtsbuech im Facebook, und bim Aaluege vo dene Bilder cha denn doch jede coronagerächt Abschiid neh vo der Fasnecht. In däm Sinn: «Aadie Fasnecht, aadie Chluuri!»

Auch der Redner einer nicht gehaltenen Chluurirede bleibt selbstredend anonym.