Ammeletten und Wältuntergang

In ere Chuchi. Tochter, Vatter, Hund (stumm) D Tochter: «Wie ischs amme gsi in de Sibzgerjoor? Mit Peace und Flowerpower und so. Hesch vo denn no so cooli Outfits neumen uf em Eschtrig?» Der Vatter: «Dasch doch lengschtens alles furt.» – «Worum heschs nit ufgspart für mi?» – «I ha jo denn nit chönne wüsse, ass es di mol git!» –«Ich hätt au wellen in de Sibzgerjoor läbe. Sooo cool!»
– «So cool au wiider nit. Und wenn I di so aalueg, meinsch, s hätt dir gfalle, numme winzigi Schwarzwyssfärnseh, kei Handy und kei Internet?»

«Meinsch, das wüss ich nit, bin ich dumm oder was?» – «Und im Chalte Chrieg het me nie gwüsst, wenn sii aaföngen Atombombe schmeissen und öbb gly der Wältuntergang chunnt.» –«Aso wemme das no sälber erläbt het, isch men ächt alt.»

«Bitte?» – «Nei ehrlig, sozsägen uralt – tuet mer jo leid für di! Und chasch bitte mol die Sigeretten abmache, ich will no myni Organ chönne spände! Aso, was isch jetz mit däm Wältuntergang?» – «Weisch, in de Sibzger häi d Lüt no Nahrigsmittel ghortet im Luftschutzchäller us Angscht vor em Atomchrieg. Was miechsch jetz du hüt, wenns plötzlig kei Strom meh geeb, kei Netz, kei Färnseh, kei
Benzin und alles das? Und in de Läde geebs au nüt meh und me würd afo hungere?

«…?…» – «Hesch gwüsst, ass der Mensch bin re Hungersnoot in chürzischter Zyt wiider zum Raubtier wird? No isch er zu allem fähig. No frisst er zerscht syni Huustier und denn chunnts zu Mord und Totschlag wäg me
Stück Brot. Das weiss men us der Gschicht, das hets früehner scho vill gee!»

(lycht hysterisch) «Du au?» – «Was?»

«Du würdsch denn au eusi Lola uffrässe, eusi härzigi Lola?» (nimmt Hund uf en Arm)
– «Wär weiss, was der Hunger mit eim miech? Jä, eventuell scho.» –«Lola, dä will di frässe!»

«I säg, eventuell, und nit, ass I s mach!» – «So ein bisch du aso. So öppis vo egoistisch! Das goht jo woll gar nit! Ich bi Vegetarieren und lieber will ich stärbe, as d Lola frässe, wie du!» – «Hallooo, I säg doch numme, wie’s villicht weer, wenn…!»

«Du närvsch voll im Fall und uf so Diskussione han ich überhaupt kei Luscht, mit eim, wo euse Hund frisst!» – «I friss doch nit euse Hund!» – «Aber du würdsch und dasch der Punkt – ellei der Gedanke dra isch scho voll abartig. Hätt ich nie dänkt vo dir, ächt! (Schmuuspause mit Hund) Was git’s zum Znacht?» –«Ammelette. Und Chees und Salat.» –«Scho wiider? Ammelette hets vor zwoo Wuche scho gee.» – «Genau – aber syge mer doch überhaupt froh, ass es immer öppis git, vo wäge Hungersnoot und so, gäll!» –«Machsch für mi eini mit Mozzi und Tomate?» – «Jo, I rüef denn.»

«Die in de Sibzgerjoor häi rächt gha: ‹Traue keinem über dreissig!› Me gseht jo, wies uusechunnt! Gäll Loli, will dä di no frässe!
(im Abgoh) Im Fall, me macht aso scho eine mit as älleierziehendi Tochter vo somne
Vatter!»

Florian Schneider wurde 1959 geboren und stammt aus Reigoldswil. Er ist Sänger, Schauspieler und Liederschreiber und lebt mit Tochter Mina in Eptingen.