Allergattig Hünd

Äis vorewägg: Y ha käi Hund
und wett au käin, us guetem Grund.
Y find, es häig esoo scho gnue,
drum chunnt vo miir käin me derzue.

Tierlihasser bin y käine,
falls daas jetz öbber sötti mäine.
Mii stört halt – au us guetem Grund –
e mänge unerzog’ne Hund,

wo jo numme spiile wött,
was iich halt akzeptiere sött.
Oder wo am Gartehaag
d Lüt aabällt, der lieb lang Daag.

Zur «Hunderettig» git’s am Fryttig
Erfröilichs z lääsen in der Zyttig:
Schwäisshünd wärde porträtiert
und uf waas me se trainiert.

Bim Lääse han y en Idee:
Y chönnt’s in Zuekumft locker neh!
Wenn y e blööde Bäffzgy gseh,
dänk y: «Schwäisshund – ohni w!»

Äigebröödler